حضرت عبداللہ بن مسعود رضی اللہ عنہ

نام و نسب:

نام عبداللہ ،کنیت ابوعبدالرحمن اور قبیلہ ہذیل سے تعلق رکھتے تھے۔

پورا نسب یوں ہے: عبداللہ بن مسعود بن غافل بن حبیب بن شمع بن فار ابن مخزوم بن صاہلہ بن کاہل بن الحارث بن تمیم بن سعد بن ہذیل بن مدرکہ بن الیاس بن مضر بن نزار ابو عبدالرحمٰن الہذلی۔

( اسد الغابہ لابن الاثیر الجزری ج۳ ص ۱۶۷ ،الاصابہ لابن حجر عسقلانی ج۲ ص ۱۱۲۲،سیر اعلام النبلاء للذہبی ج۳ ص ۲۰۴)

حضرت عبداللہ بن مسعود رضی اللہ عنہ قدیم الاسلام صحابی ہیں۔بعض روایات کے مطابق چھٹے فرد ہیں جو حلقہ اسلام میں داخل ہوئے (اسد الغابہ ج۳ ص ۱۶۷،الاصابہ ج۲ ص۱۱۲۳،سیر اعلام النبلاء ج۳ ص۲۰۶)ایک اور روایت کے مطابق آپ نے حضور صلی اللہ علیہ وسلم کے دار ارقم میں داخل ہونے سے پہلے اسلام قبول کرلیا تھا ۔

(سیر اعلام النبلاء للذہبی ج۳ ص ۲۰۷)

اسلام لانے کا سبب:

امام ابن العماد الحنبلی ابن الاثیری جزری رحمہ اللہ اور دیگر حضرات نے آپ کے اسلام لانے کا سبب یہ بیان کیاہے کہ آپ عقبہ بن معیط کی بکریاں چرایاں کرتے تھے۔ ایک دن آنحضرت صلی اللہ علیہ وسلم اور حضرت ابوبکر صدیق رضی اللہ عنہ ان کے پاس آئے۔ آپ بکریاں چرارہےتھے۔ آنحضرت صلی اللہ علیہ وسلم نے فرمایا: ’’اے غلام! کیا تمہارے پاس دودھ والی بکری ہے؟‘‘عرض کیا: ’’ جی ہاں، لیکن مجھے اجازت نہیں ۔یہ بکریاں امانت ہیں۔‘‘ آنحضرت صلی اللہ علیہ وسلم نے فرمایا کہ کوئی ایسی بکری لے آؤ جو دودھ نہ دیتی ہو۔ چنانچہ حضرت عبداللہ بن مسعود ایسی بکری لے کر حاضر خدمت ہوئے۔ آپ صلی اللہ علیہ وسلم نے اس کے شیردان پہ ہاتھ پھیرا اور دعا کی تو دودھ اتر آیا۔ حضرت ابوبکر رضی اللہ عنہ ایک پتھر لائے، اس میں دودھ نکالا گیا۔ آپ صلی اللہ علیہ وسلم نے حضرت ابوبکر کو دودھ پینے کا فرمایا، پھر خود پیا اورعبد اللہ بن مسعود کو بھی پلایا۔ عبداللہ بن مسعود آپ کا یہ معجزہ دیکھ کر بول پڑے کہ مجھے بھی یہ بات یا اس قرآن سے سکھا دیجئے۔تو آپ صلی اللہ علیہ وسلم نے ان کے سر کو مسلا اور فرمایا ’’ انک غلام معلم‘‘) تو ایسا نوجوان ہے جو سیکھنے کے لائق ہے ۔)

قبول اسلام کے بعد حضرت عبداللہ بن مسعود رضی اللہ عنہ نے کلام اللہ اور کلام رسول اللہ کو ایسا سیکھا کہ امت کے امام بن گئے۔

خود فرماتے ہیں کہ میں نے نبی اکرم صلی اللہ علیہ وسلم سے ستر سورتیں سیکھی ہیں رسول اللہ صلی اللہ علیہ وسلم کے بعد بلند آواز سے قرآن مجید پڑھنے والے سب سے پہلے شخص سیدنا عبداللہ بن مسعود ہیں۔

(اسد الغابہ ج۳ ص ۱۶۷،سیر اعلام النبلاء ج۳ ص ۲۰۸)

حلیہ مبارک:

حضرت عبداللہ بن مسعود چھوٹے قد ،گندمی رنگ،باریک پنڈلیوں ،کمزور اور لطیف جسم والے لیکن علم کے کوہ گراں تھے۔ایک مرتبہ نبی اکرم صلی اللہ علیہ وسلم نے حضرت عبداللہ بن مسعود کو پھل لانے کے لئے درخت پر چڑھنے کا حکم دیا ۔حضرت عبداللہ بن مسعود درخت پر چڑھے ۔صحابہ کرام ان کی پنڈلیاں دیکھ کرہنس پڑے ۔تو رسول اللہ صلی اللہ علیہ وسلم نے فرمایا :’’ عبداللہ کی ٹانگ قیامت کے دن میزان میں احد پہاڑ سے زیادہ وزنی ہوں گی‘‘

(مجمع الزوائد ج۹ ص ۷۳ حدیث :۱۵۵۶۱کتاب المناقب)

حضرت عبداللہ بن مسعود رسول اللہ صلی اللہ علیہ وسلم کی نظر میں:

نبی کریم صلی اللہ علیہ وسلم نے فرمایا :

’’وما حدثکم ابن مسعود فصدقوہ‘‘

(جامع الترمذی ج۲ ص۲۲۰ مناقب عمار بن یاسر)

کہ عبداللہ بن مسعود تمھیں جو بیان کریں اس کی تصدیق کرو۔

حضرت عبداللہ بن مسعود فرماتے ہیں کہ رسول اللہ صلی اللہ علیہ وسلم نے فرمایا : ’’تمسکوا بعھد ابن مسعود‘‘

(جامع الترمذی ج ۲ ص ۷۰۱مناقب عبداللہ بن مسعود)

کہ عبداللہ بن مسعود کے پختہ عزم کو تھام لو۔

حضرت عبداللہ بن عمرو فرماتے ہیں کہ رسول اللہ صلی اللہ علیہ وسلم نےفرمایا: اقرؤا القرآن من اربعۃ نفر من ابن ام عبد فبدأ بہ‘‘۔

(صحیح مسلم ج۲ ص ۲۹۳،جامع الترمذی ج۲ ص ۷۰۱)

کہ قرآن چار آدمیوں سے پڑھو ،ان چار میں سےپہلا نام حضرت عبداللہ بن مسعود کا لیا ۔

حضرت عمار بن یاسر سے روایت ہےکہ رسول اللہ صلی اللہ علیہ وسلم نے فرمایا :

’’من احب ان یقرأ القراٰن غضا کما انزل فلیقرء علی قراء ۃ ابن ام عبد ‘‘

(مجمع الزوائد ج۹ ص ۴۷۱ حدیث ۱۵۵۵۶،مستدرک حاکم ج۴ص۳۷۹حدیث :۵۴۴۱)

کہ جس شخص کو پسند ہو کہ وہ قرآن اس لہجے میں پڑھے جس لہجے میں نازل ہوا تو وہ عبداللہ بن مسعود کی قرأت کے مطابق پڑھے۔حضرت علی المرتضیٰ سے مروی ہے کہ رسول اللہ صلی اللہ علیہ وسلم نے فرمایا :

لوکنت مؤمرا احدا من غیرمشورۃ لامرت ابن ام عبد۔ (جامع الترمذی ج۲ ص۷۰۱)

اگر میں کسی کو بغیر مشورہ کے امیر بناتا تو عبداللہ بن مسعود کو بناتا